الشاعر محفوظ الفارسي

قصيدة: على ورق / للشاعر محفوظ الفارسي

على ورق

والصبح عواد القصيدة في مداها الرخو

وغيم انزياحات الكتابة الصحو

على ورق

وما صدق.. إلا  زمان الشح في عينك

وينك؟!

قلتيلي لما تكبر بعيني أنا اللي بكتبك

شقيتي صدري بلاد

وما كتبني شي

وما صدقني شي

وما ملاني في غيابك صوت

وما مر في عيني يمامك /

سحابك/

خضابك/

رحابك ضي

رحتي وأخذتي عيني في عينك

بس تعالي  ..

تعالي شوي ..

مب انتي اللي سولفت للشمس بأول صبح

مب انتي اللي قال من دوني القصايد

 ما تساوي شي

وما صدقتي بشي

على ورق  ..

وبعض القصايد تجترح أسماءنا الرطبة

نخونها ف رمل السنين الحاطبة

وتخوننا عصبة

نْمرها عيونٍ قراها الرمل

وتمرنا جروحٍ على باكر ورقها حي

على ورق ..

والصبح عواد القصيدة في مداها الرخو

وغيم ..

غيم انزياحات الكتابة / الصحو .

مقالات مرتبطة

1 من 2